Virun enger Zaitchen hun e puer Kollegen sech zesumme gesaat an décidéiert fir Massen ze sangen. Sou koum ët dun dass déi Leit och kuerz dono, anzwar am Dezember '95, an der Millebaach eng Kannermette gesongen hun. An dëst war déi éischte Keier, dass d'Claudine Peters dëse "Chouer" dirigéiert huet. Déi nächst Massen hun, wéi der iech kënnt denken, nët laang op sech waarde gelooss ...

1996 krut d'Claudine den Optrag fir d'Oktavmass vun de Stadter Lycée'en musikalesch ze gestalten. No dëser Mass huet de Chouer sech dun definitv och ënnert der Form zesummefonnt wéi en haut nach besteet (och wa verschidde Memberen nët méi derbäi sin, respektiv neier bäikomm sin). An dësen Ensemble Vocal huet sech dun och am Juni '96 fir d'éischt Kéier richteg présentéiert.

Ëmmer méi Leit sin un eis erugetrueden mat der Fro op mir hinnen déi eng oder aner Mass sange giffen, a virun allem och Hochzäiten, op déi mir eis schliesslech spezialiséiert hun. Sou ass ët dann och nët verwonnerlech dass mir schon a ville verschiddene Kiirche gesongen hun, ënnert aanerem : an der Kathedral, zu Iechternach an der Basilika, zu Bartreng, um Belair, an der Garer Kiirch (Sacré Coeur), zu Diddeleng, um Briddel, zu Waldbriedemes, zu Wentreng, etc. ... je sou zimlech uechter d'ganzt Land, an souguer heiansdo och am Ausland.

Mee mir hun nët nëmmen Hochzäite gesongen, mir haten och schon den een oder aanere Concert, wéi zum Beispill den Telethon, verschidden Iwweraschungsconcerten, Krëschtconcerten, a Concerten mat der Harmonie Gemeng Mamer ënnert der Leedung vum Marco Battistella.
Fir d'Geléenheet vum Telethon hu mir eis dun och e Numm zouléen missen. An u sech war ët och nët immens schwiereg e Numm ze fannen, ët huet eppes misse sin wat mat Freed ze din huet, well während de Prouwen hu mir wiirklech ëmmer immens vill Freed. Also hu mir geduecht, dass A Piacere (mat Freed) nachewell nët schlecht passe giff.

Eisen Ensemble setzt sech aus enger 20 Jugendlechen tëscht 18 an 35 Joer zesummen, déi alleguer Freed a Spaass un der Musék hun. Eng ganz Partie vun eis spillen och aktiv een oder méi Instrumenter am Stadter Conservatoire, hun hire Solfège hannert sech, maachen Harmonie, Chant asw ... . Obwuel déi meecht vun eis am Ausland op den Uni'en sin, komme mir awer bal ëmmer heem wann ët de Weekend heescht: "Ët ass Prouf".

D'Netty Glesener begleed eis vun 1996 un um Piano, an Dirigentin vun der éischter Minute un ass, wéi gesot, eis "Cheffin" d'Claudine Peters.